Tamamilə yalan və uydurma iddialardır - Ehsan Zahidov

Tamamilə yalan və uydurma iddialardır - Ehsan Zahidov

Mayın 23-də "Müdafiə xətti"iylə Müsəlman Birliyi Hərəkatının keçirdiyi birgə mətbuat konfrasında hərəkatın iki üzvü Mail Kərimov və Süleyman Ələkbərov  DİN-in Baş Mütəşəkkil Cinayətkarlıqla Mübarizə İdarəsində fiziki təzyiq və təhdidə məruz qaldıqlarını iddia ediblər. Onlar bildirib ki, mayın 20-də Ağır Cinayətlər Məhkəməsinin önünə toplaşdıqlarına görə, polislər tərəfindən saxlanılaraq DİN-in Baş Mütəşəkkil Cinayətkarlıqla Mübarizə İdarəsinə aparılıblar. 

DİN Mətbuat Xidmətinin rəisi, polis polkovniki Ehsan Zahidov Azadmediatv.com-a bildirib ki, qeyd edilən iddialar tamamilə əsassız və yalandır:

“Bir qrup şəxs həmin gün zərurət olmadan məhkəmənin önündə toplaşaraq səs-küy salıb, nəqliyyatın və piyadaların hərəkətinə ciddi maneələr yaradıb. Polis əməkdaşları yaxınlaşıb onlardan dağılışmağı və ərazini tərk etməyi tələb edib. Mail Kərimovla Süleyman Əlkəbərov polisin qanuni tələblərinə riayət etməyərək asayişin pozulmasına yönələn hərəkətlərini davam etdiriblər.  

Dünyanın ən inkişaf etmiş, ən demokratik ölkəsində polis belə halda mütləq silaha əl atır, müqavimət göstərən şəxsi sərt qaydada zərərsizləşdirərək barəsində ağır cəza tətbiq edir. Lakin bizim polis əməkdaşları hər iki şəxsi ərazi üzrə olan polis bölməsinə gətiriblər. Orada onlarla profilaktik söhbətlər aparılıb və xəbərdarlıq edildikdən sonra sərbəst buraxılıblar.  

Lakin onlar polis bölməsindən çıxdıqdan sonra guya Baş Mütəşəkkil Cinayətkarlıqla Mübarizə İdarəsinə aparıldıqlarını, orada döyüldüklərini tirajlayıblar.  
Adi inzibati qayda pozan şəxs nəinki həmin gün, ümumiyyətlə qeyd olunan baş idarəyə aparılmır. Çünki adından göründüyü kimi qurum hansısa inzibati xəta törədənlərlə deyil, mütəşəkkil cinayətkarlıqla mübarizə ilə məşğuldur. 

O ki qaldı guya onların polis əməkdaşları tərəfindən döyülmələrinə, təhqir edilmələrinə, tamamilə yalan və uydurma iddialardır. Çox təəssüflə qeyd edirəm ki, Mail Kərimovun və Süleyman Ələkbərovun yalanlarına, polisə şər-böhtan atmalarına özlərini hüquq müdafiəçiləri adlandıran bəzi “hüquqşünas”lar da ortaq olublar və mətbuat konfransı keçirərək media təmsilçilərini də öz cəfəng iddialarına inandırmağa cəhd ediblər. Amma unudurlar ki, belə məqsədli şəkildə, qəsdən uydurulan əsassız iddiaları yaymaq hüquqi məsuliyyət yaradır".

Qeyd edək ki, hər iki şəxs işgəncəyə məruz qaldıqlarını və zorlanmaqla təhdid edildiklərini KİV-nümayəndələrinə açıqlamalarında bildiriblər.

Azadmediatv.com

 

 

 

 

 





OXŞAR XƏBƏRLƏR