Hər iki şəxs Polis Bölməsində barışdıqdan sonra  sərbəst buraxılıblar - EHSAN ZAHİDOV

Hər iki şəxs Polis Bölməsində barışdıqdan sonra sərbəst buraxılıblar - EHSAN ZAHİDOV

Sosial şəbəkələrdə Bakı Metrosunun Nizami stansiyası yaxınlığında Post Patrul Xidmətinin əməkdaşları tərəfindən qazi olduğu deyilən Elvin Bədəlovun döyülməsi iddiası yayılıb.

İddialarda bildirilib ki, yol kənarında oturmuş E.Bədəlov PPX əməkdaşları tərəfindən döyülüb və halı pisləşdiyi üçün ona Təcili Tibbi Yardım çağırılıb. O da qeyd olunur ki, Bədəlovla həyat yoldaşı bölmədə 3 saat saxlanılıb və onlara təzyiq göstərilərək bir-birilərindən şikayətçi olmamaları haqda izahat alınıb.

DİN Mətbuat xidmətinin rəisi, polis polkovniki Ehsan Zahidov  Azadmediatv.com-a açıqlamasında iddiaların həqiqəti əks etdirmədiyini bildirib: "Ərazidə olan vətəndaşlar Post Patrul Xidmətinin əməkdaşlarına müraciət edərək, bir qadın və kişinin mübahisə etdiyini bildiriblər. Polis əməkdaşları mübahisə edən həmin şəxsləri ərazi üzrə Yasamal rayonu 27-ci Polis Bölməsinə gətirmək istəyərkən E.Bədəlov adlı şəxs müqavimət göstərərək, getmək istəməyib və özünü yerə yıxıb. Bu zaman əraziyə ikinci Post Patrul Xidməti avtomobili çağırılıb.

Həmin şəxslər  bölməyə gətirildikdən sonra məlum olub ki, onlar bir ay öncə ailə həyatı qurublar və mübahisə etmələrinin səbəbi də qadının həyat yoldaşından icazəsiz mağazaya getməsidir. Hər iki şəxs Polis Bölməsində barışdıqdan sonra izahat yazaraq, şikayətçi olmadıqlarını bildiriblər və sərbəst buraxılıblar".

Azadmediatv.com




OXŞAR XƏBƏRLƏR