Növbəti əfv sərəncamının 2022-ci ilin Novruz bayramı ərəfəsində verilməsi gözlənilir

Növbəti əfv sərəncamının 2022-ci ilin Novruz bayramı ərəfəsində verilməsi gözlənilir

Azərbaycan Respublikasının Vətən Müharibəsində qələbəsi münasibətilə qeyd ediləcək Zəfər Günü ərəfəsində əfv sərəncamının verilməsi gözlənilmir.

Azadmediatv.com-in xəbərinə görə,  bu haqda Əfv Məsələləri Komissiyasının üzvü, hüquq müdafiəçisi Əliməmməd Nuriyev açıqlama verib. 

Sonuncu əfv sərəncamının 2021-ci ilin bu ilin əvvəlində imzalandığını xatırladan Ə.Nuriyev  növbəti əfv sərəncamının  ehtimal edilən  tariximi açıqlayıb:

“Əfv sərəncamının verilməsi ölkə başçısının müstəsna səlahiyyətlərinə daxildir. Amma sərəncamın bu ilin əvvəlində verildiyini nəzərə alsaq, ilin sonuna yeni sərəncam veriləcəyini ehtimal etmirəm. Belə olacağı təqdirdə Komissiyanın iclasları çağırılmalı idi. Hazırda isə hansısa iclas keçirilmir və keçirilməsi nəzərdə tutulmayıb. Növbəti əfv sərəncamının ənənənvi olaraq, 2022-ci ilin Novruz bayramı ərəfəsində verilməsi gözlənilir”.

Qeyd edək ki, Prezident İlham Əliyevin bu il martın 18-də imzaladığı sonuncu “Məhkum edilmiş bir sıra şəxslərin əfv olunması haqqında” sərəncam 625 nəfərə şamil olunub.

Sərəncama əsasən, azadlıqdan məhrumetmə cəzasına məhkum olunmuş 475 nəfər cəzasının çəkilməmiş hissəsindən azad edilib. Bundan başqa, azadlıqdan məhrumetmə cəzasına məhkum edilmiş 98 nəfərin cəzasının çəkilməmiş hissəsi yarıyadək azaldılıb.

Ömürlük azadlıqdan məhrumetmə cəzasına məhkum edilmiş üç nəfərin cəzası 25 il müddətə azadlıqdan məhrumetmə cəzası ilə əvəzlənib. Eləcə də azadlıqdan məhrumetmə cəzasına şərti olaraq məhkum edilmiş iki nəfər cəzadan azad ediliblər.

Həmçinin azadlıqdan məhrumetmə cəzasına məhkum edilmiş və cəzasının çəkilməsi təxirə salınmış üç nəfər cəzadan azad olunublar.

Azadlığın məhdudlaşdırılması cəzasına məhkum edilmiş 9 nəfər və islah işləri cəzasına məhkum olunmuş 12 nəfər cəzanın çəkilməmiş hissəsindən, cərimə cəzasına məhkum olunan 23 nəfər isə cəzadan azad ediliblər.




OXŞAR XƏBƏRLƏR