Jurnalistin kassasiya şikayəti qismən təmin edilib
Dekabrın 24-də Aki Məhkəmədə “Kanal 11" internet televiziyasının həbsdə olan rəhbəri Teymur Kərimovun barəsində olan hökmdən verilən kassasiya şikayətinə baxılıb.
Azadmediatv.com xəbər verir ki, hakim İlqar Cəfərovun sədrliyi ilə keçirilən prosesdə Teymur Kərimov vəsatətlə çıxış edib.Məhkəmə vəsatətləri təmin etməyib. Kanal rəhbəri son sözlə çıxış edərək, bəraət istəyib.
Prosesdə məhkəmə qərar qəbul edib. Belə ki,
kassasiya şikayəti qismən təmin edilib. Onun cəzası 2 il azaldılıb.
Xatırladaq ki, Bakı Ağır Cinayətlər Məhkəməsinin hökmünə əsasən, Teymur Kərimov 2 il jurnalistika fəaliyyətinə qadağa qoyulmaqla, 8 il müddətində azadlıqdan məhrum edilib. Bakı Apellyasiya Məhkəməsi təqsirləndirilən Teymur Kərimovun cəzasını 1 il azaldıb.
Teymur Kərimov və onunla birgə ittiham olunan İstək Totiyevanın barəsində Cinayət Məcəlləsinin 182.2.1-ci (hədə-qroxu yolu ilə tələb etmə, qabaqcadan əlbir olan bir qrup şəxs tərəfindən törədildikdə) maddəsi ilə ittiham elan edilib.
Onunla birgə ittiham olunan İstək Totiyevaya isə 2 il sınaq müddəti seçilməklə şərti cəza verilib.
Gülnaz Qənbərli
Azadmediatv.com
